Orosei - Oggi, 22 ottobre alle ore 17 presso il Monte Granaticu a Orosei saranno presentati i libri di Giuseppe Pirastru, poeta estemporaneo di Palco, e Tonino Fancello, poeta e scrittore.
Relatori Tonino Fancello, Tommaso Esca e Mino Nanni. Interverranno Gavino Contu, presidente del Premio Logudoro e la sindaca di orosei Elisa Farris. Presenta Francesco Cossu. Intermezzi canori Cuncordu “Corfaria de Su Rosariu” e “Juntos”.
Di seguito la presentazione dell’evento e degli autori a cura di Tommaso Esca.

Custu sero in su Montegranaticu de Orosei tenimus s’onore de ospitare unu mastru otzieresu Frantziscu Cossu “Zizzantoni”, chi nos presentat custa bell’opera de chirca e de ammentos in sigundha editzione su “Zuseppe Pirastru”, otzieresu, de sos poetas a bolu su mastru e de Tonino Fancello , durgalesu, ”Sambene e poeta”.

Zizzantoni Cossu, mastru de iscola l’at fattu una vita, ma lu este peri pro sa passione chi bi ponet comente oratore, s’istudiu, s’amore, s’impegnu pro valorizzare s’allega sarda e oje comente ricercatore e iscrittore.
Chin cumpetentzia e seriedade, in pare in Gavino Contu oje presente e atteros cumpantzos de profettu chin sa limba sarda, an postu manos e conca, pro achere creschere sos premios letterarios de Otzieri e Logudoro e tantos atteros in Sardinna.

Sono arrichindhe e documentandhe chin sa poesia e sa prosa e chin atteros limbatzos s’identidade e sa cultura de su populu sardu, pro che alluntanare s’abbrantzu de s’omologatzione sentza sensu. A sos amicos de Otzieri e a sos amicos de sos amicos, oje inoche presentes,lis cherio ammentare sos ligatzos istrintos tra Orosei e Otzieri.
Ambas cittadinas, mancari luntanas, de seculos e seculos ,vantana una venerazione manna pro sa “Madonna e su Remediu” e s’istoria comuna de sas Suoras Cappucinas, pacu connota. Issasa , ana progettatu e fraicatu su “Cumbentu de sas Montzas”, e de custa cresia sconsacrata de su 1700 chi oje nos ospitat. Sa presentzia issoro este andhata in ora mala, ca, a sa fine de su 1700, sa malaria malaitta at piccatu supravventu e una mettade se sas suoras, prima de su tempus, ana lassatu custu mundhu. Sas atteras si sono fughitas, prima a Casteddhu e poi a Otzieri, inuve an postu rauchinas. Una fitta de istoria chi nos accomunat e chi diat essere bellu de l’apprufundhire.

Torranghe a Zuseppe Pirastru, este nascitu in Otzieri su 23 de Santugaini de su 1858, e a crasa zustu 164 annos de sa naschita.
Issu, candho teniata 38 annos,in su 1896, in pratha de Santu Sostianu, chin Antoni Cubeddu e Zuseppe Morittu, sono istatos sos primos poetas a artziare in parcu pro poetare a bolu, in Sa Festa manna de sa Madonna e su Remediu in Otzieri. Custu libru dopo prus de chent’annos li dat s’onore chi si meritat. Sa poesia a bolu este una de sas raichinas vonas de s’identidade de sos sardos. In Sardinna dae sempere amus trascuratu s’iscrittura, ma amus affortitu e tramandhatu, a voche, dae una zeneratzione ass’atera una cultura, fatta de poesias e contos. Custa forma de disaogu, candho sa matha fit prena de alimentu e de carchi tassa e vinu, fit un’arte in donzi comunidade sarda, chi alligrait su coro e sa mente de tottus e chi arrichiat sa connoschentzia. Sas raichinas de custu modu de poetare son de chircare in sa civiltade greca, latina e non solu, de su Mediterraneu.
Zuseppe Pirastru teniat su donu de poetare rimas bragheras de temas improvvisatos in garas a cuntierra. Otzieri, est connota pro essere sa viddha de sa poesia e, paris chin su Logudoro e su restu de sa Sardinna nos at tramandhatu custa fitta de identidade, peri si,iscolas e sistemas novos de comunicazione nos sono accomunandhe a una cultura chi non este sa nostra.

Tonino Fancello, lu tenet in su sambene a poetare.
Sas rimas suas indurcana s’anima e illepiat s’ispiritu de sas pessones chi lu leghen oje chin passione. Este unu poeta de valore, durche e beffulanu,alligru e prufundhu chi li piaghet de amorazzare e ispiddhuthare sas paraulas ,de sa limba sarda, pro li dare sapore e cunfortu a su poetare suo.
Cherio serrare custas cunsideraziones meas chin s’ammentu de Totore Cherchi, poeta de Orosei:

Chie colat in su mundhu e non si arressat,
a lassare amore inuve colat,
sa vita chene contu che li colat
e a s’arregorta solu ventu messat.