Narat su ditzu: “Chentu concas, chentu berrittas” coment’a narrere chi cadaunu est mere de la pessare comente diat cherrere. Deo la pesso in custa manera e duncas, su chi pesso, lu naro chin s’ispera chi nessi calicun’atteru de bois, a contos fattos, la pesset che a mimme. Carr’a secare! Nosse, non pessezas chi mi soe isballande in sa manera de l’iscrivere, ca pro mene est gai, né Carnevale (in tempus de su cale “ogni scherzo vale”) e nemmancu Carrasecare chi, iscrittu in custa manera, non resesso a crumpendere itte nanchi cheret narrere. Pro prus de trint’annos, jà l’ischies, soe andau iffattu de sas festas e de sos usos anticos de “tottu” sa terra nostra (e de cussu mi banto), in chirca de los connoschere, crumpendere e istimare. Mastra de cuss’iscola pro mene est istada Dolores Turchi a sa cale torro grassias pro meda de tottu cussu chi appo crumpesu e imparau (e mi pranghet su coro pessande chi medas pacos mi sian fachende cumpannia in custa torradura). 

E duncas, proitte Carr’a secare? Deo naro chi siat pro dare unu “cheret narrere” a s’attera manera de l’iscrivere. In Sardigna, dae sas dies de sos focos de Sant’Antoni e Santu Bustianu, a sa die de su “Merculis de lissiba” (innantis chi cumintzet sa Caresima), in antichidade, essian a campu sas mascheras de su connottu, e non fin mascheras brulleras, e galu de mancu mascheras de cuntentesa. Proitte naro goi? Ca in sa manera de fachere, a las biere, ponian pagura, mascamente a sas creaturas. Carratzas de linna chi, a lis narrere lezzas, diat parrere un accasazu. Burdellu indemoniau de sonazos a pore, peddes pudessias bocadas a campu pro s’occasione, insomma, a contos fattos, bi fit su tatu de narrere chi cussas mascheras fin mascheras bruttas e non mascheras nettas. Est peri pro cussu chi, in medas biddas, fin essias a campu cussas mascheras differentes (sas nettas), bestias a sant’arranzati, chi andavan a trumas, dae dommo in dommo, pro ballare ballos tundos, assazare sas cattas e toccare su binu nobu. 

Ecco, cussu podiat essere unu Carrasecare, su Carnevale istranzu bortau a sa sarda. S’atteru, imbetzes, fit unu Carr’a secare chi, in su colare de sos annos, fit benniu mancu, in tottube, sarbu in carchi bidda in sa cale s’usantzia resessiat a mantennere s’ammentu. Mamoiada, chin sos Mamuthones, fit una de cussas pacas, e toccat de li dare bantu. 

Fatt’istat chi Dolores Turchi, in sos annos ’70,  s’est posta a fudichinare in sos ammentos de sos betzos (galu in tinu) de cada bidda e, atzicu in tottube, ch’at bocau a campu ammentos chi parian ismenticaos. Beh, in cada bidda bi fit s’ammentu de mascheras anticas chin peddes, sonazos e carratzas de linna. E in cada bidda, porrocada, cussas mascheras si moghian comente chi seren fachende faina de importu mannu e non de trallallero. Itte nanchi fin fachende? Una de sas mascheras, bestia in manera differente dae sas atteras, beniat istripatzada, de cada manera e iscutta fintzas a cando non rughiat a terra comente chi seret morta. Appustis de pacu (in carchi bidda s’ammentavan de una sorta de accasazu) cussa maschera si pesavat dae terra e torravat a cumintzare “un’attera bida”. Est in cussa baraunda chi Dolores Turchi b’at cherfiu biere una morte mala, non de badas peroe. Una morte dae sa cale essiat a campu una bida noba, gaiettottu comente capitavat a Dioniso in s’antichidade sua. 

Torravat gai su contu? Bae e pisca! Deo l’appo dau resone e, in tottube appo pottiu, contipizande sas fainas meas, appo semper faveddau de “Rito Dionisiaco”, mustrande sas fotografias (chi fachio in tottube) pro dare valore a su chi navo. E duncas, cussu, pro mene, fit su Carre a secare .. Carr’a secare (carre biba de secare, e non petta morta), cussu chi pro sos istranzos (chi in tottube an imparau a connoschere e a istudiare) fit il Carnevale delle maschere cupe… E commo bos dimando: Est galu gai? Est galu il Carnevale delle maschere cupe? O est atteru?

Salamitra