Beh, custa borta bos cherjo contare unu contu chi est una camba birbe de sa bida mea, ma non de sa mea ebbia ca est peri de sos medas cumpanzos chi, paris chin mecus, a mettade de sos annos Sessanta de su seculu colau e peri de su millenniu nos semus postos a “tennere tutturreddos” pro nanchi essere “tutturreddos” nois puru. Eja tutturreddos! Chie mi cheret crumpendere jà m’at crumpesu. Duncas, fin sos tempos de sas “sisajas” de Liverpool, de sos Beatles (a bo-los ammentaes?). Custas sisajas si fin postas, belle chi sonavan e cantavan (e beniminde!), a nche bortulare sa bagna ponende sos fizos contr’a sos babbos pro more de sos pilos longos e de sas iscarpasas mascrinas a mesu taccu femininu chi juchian e chi a nois (criallera de su tempus) piachian a dischissiu. E duncas pro more de cussa musica issoro su mundu s’est postu a si bulluzare e, azzicu in tottube, b’at essiu a campu abbolottu, bonu e malu a sicunde. S’iscusa nde cherjavamus! 

Nois, a narrere sa beridade, pesso chi l’appamus connottu “in bonu” cuss’abbolottu e amus cumintzau.. male comente podiavamus chin gherra meda e non paca, abbirgonzios a sicunde a nos lassare creschere sos pilos (a biere sas criticas oignai!) e a ballare sos ballos nobos, shakes, mascamente ascurtande sos discos dae sos grammafonos chi, a los pompiare e intendere oje, nos iscappat su risu e su prantu.

Ajavamus bisonzu de loccu peroe ube addobiare, ube ballare custos ballos nobos e jà fit una pudda! Permissos de cada zenia bi cherian, dae sa Questura mascamente e i prus su “chi no-no” dae sos meres de dommo chi timian chi sas dommos issoro seren diventadas, pro more de custa zoventude ischerbeddada, casinos. Perdonaemi sa paragula ma cussa fit sa paragula, paris chin su timore… Beh, non b’azes a credere ma sa borta ajvamus postu sos babbos e sas mamas a pedire in parte nostra, ca issos (nessi sos nostros) ischian de aere fizos de gabbale e non bascaramene o rattattuglia. Cussu fit su bantu nostru! E dada no-l’an sa dommo! 

Fit belle a s’incuminzu de via Chironi, a mur’e mesu chin sa butteca de zia Valentina, sa durchera. E in cue est naschiu “Il pipistrello”, su Tutturreddu. Fimus parte de s’associazione nazionale Ciao Amici Club, e su papiru chi nos davat su dirittu de pedire e ottennere s’autorizzazione de sa Questura cussa associazione no-lu davat, E duncas amus cumintzau a nos ponnere male comente podiavamus, cadaunu in s’arte sua, a tunicare, pintare e adderettare (su chi cheriat adderettau) in cussa dommo chi fit tancada dae medas annos. Fatt’istat chi l’amus fatta un’incantu, ca fit unu piachere a b’intrare. In cue est cuminzada sa balentia nostra e dae cue semus resessios a non bi fachere essire un’iscandalu chie est unu. Medas de nois inibe an connottu pitzinnas mai connottas chi benian a ballare, si sun postos paris e appustis de annos si sun peri cojubaos e galu cojubaos sun! Calicuna de cussas pitzinnas, b’at de narrere, beniat a ballare al Pipistrello accumpanzada dae su babbu e naro chi sa cosa fit cosa galana. 

E in su mentras a l’ischies itte bi capitavat in Nugoro e non in Nugoro ebbia? A bo-l’ammentaes? Sos muros de sos caminos fin prenos de manifestos chin sas “taglias”, chin sos retrattos de sos latitantes de tennere pro los arrestare chin su valore de cadaunu postu sutta, 10.000.000 fin su prus e tando 10.000.000 fin meda robba abberu! “Vivo o morto” non bi fit iscrittu peroe est comente chi bi seret istau. “Ricercato” Graziano Mesina, Miguel Atienza, Giuseppe Càmpana, Giovanni Pirari e atteros medas… Zenia de bantu pro sa zente sardignola. Carchi furapudda jà bi fit in mesu, ma su prus fit zente timia. Fatt’istat chi zustissia meda a travicu. Zovanos de sa Celere chi, pro su prus, fin bennios dae fora prenos de pagura, ca pessavan chi fimus zente de timere tottu-cantos… Oignai… E nois pessande a su ballare. Pessandebi oje deo naro chi pro nois fit una manera dechida de non bi pessare a su male chi nos fit cuzicande de cada manera. 

E duncas, imbetzes de chircare amparu in sos telefoneddos de commo, chi non bi fin telefoneddos chi, abbisu meu, istresian sa zente (cadaunu istravanande su suo sende paris chin medas atteros) istresian sa zente, fippo nande, imbetzes de l’accurziare. Nois chircavamus de abbarrare accurtzu su prus chi podiavamus. Ma cale ballos a distantzia, belle chi giai fin cumintzande a essire a campu! Corommeu cussos ballos de sas matonellas chi fit una lastima cando finiat sa musica. Sa musica. E duncas, sa musica in su Ciak nostru fimus resessios a la sonare imbetzes de l’intendere dae sos discos. Fimus resessios a nche remonire cumpanzos chi s’arranzavan a sonare bottes e chitarras e peri a cantare cantones nostras e peri cantones istranzas. Mancu nau chi las istra-va-na-van male comente podian a sa macconatzina, ca de su chi cantavan ischian su sonu, non cussu chi cheriat narrere. Ma andavat bene su matessi ca fimus paris, abbarravamus paris e paris istravamus bene ebbia. E duncas.. “I Caimani” fin bennios a sonare e a cantare a domo nostra: Marco Camedda, Lucio Piras, Celestino Orsi, Frediano Papi, Graziano Porcqueddu. A custos s’annaghian dae borta in borta Salvatore Porqueddu, Tonino Bruno e mascamente Piero Azara, Piero Azara! In atterube sonavan i “Cast 36”, i “Maya”, “H2SO4”, “Eagle”, “Granchi”, “Volti”, “Harlem” (chi nanchi sovana jazz) e bae e pisca tottus sos atteros, ca bi nd’ajat peri atteros. Fatt’istat chi in Nugoro, a sos tempos, b’aiat zoventude sana chi s’ischiat inzeniare, divertire chene fachere casinu e burdellu e mascamente chene secare ampullas de birra in sos caminos ispartinande bridu 

E commo, pro tancare in bellesa, los cherjo numenare tottu-cantos sos cumpanzos e cumpanzas de tando, ca non est birgonza s’ammentu de ammentos galanos. Mi pranghet su coro pessande a cussos chi commo prus non bi sun, in su chelu sian. E duncas sos sonadores los appo giai numenaos innantis e commo cumintzo chin sos balladores: Graziano Bardi, Ignazio Frogheri, Rina Arru, Tore Ledda, Franco Ladu, Bruno Tedde, Gianni Moledda, Banneddu Ruiu, Mario Lentini, Domenico su carrale, compare Domenico Manca chin sa muzere Angela Sedda, compare Bastiano Congiu, Gianni Careddu, Antonella e Reginella Fiori, Nina Ladu sorrastra mea, Giustina Bua attera sorrastra mea, Graziano Corda, Carletto Murru, Bruna Mingioni, Raffaellino Lai, Nevio Ladu, deo, muzere mea, Mariella, e sos atteros medas chi non bi resesso a m’ammentare ca soe cumintzande a m’istenteriare ca sos annos los appo. E duncas, a sos chi non m’ammento, pedo de non si l’aere a male ca semus faveddande de sos annos 1966, 1967 e 1968, s’annu chi mi soe cojubau e jà est una pudda! 

E duncas? Comente finit su contu de su Pipistrello? Chin carchiu cojubiau chi est galu andande e chin ammentos chi nemmos cheret ismenticare, ca tottu-cussos chi appo numenau cando nos addobiamus non fachimus atteru che faveddare de su Tutturreddu. Corommeu a bi podere torrare a cussos tempos! E duncas, Piero Azara, unu de cussos cumpanzos prus che cumpanzu amicu carrale, custas die m’at cherfiu ustrinare chin d-una cantone chi a sos tempos del Pipistrello sonavat inibe e mi piachiat a macchighine. “La ruota”. Commo est in Parigi dae medas annos, est in pensione, at arrimau de travallare ma non de sonare e cantare. Cantat e sonat de gabbale a contu suo e inibe at fattu, ed est fachende, medas discos chi in Franza aggradin meda e non pacu. Fatt’istat chi custu est s’ammentu suo de su tempus del Pipistrello, sonau e registrau pro mene e muzere mea. Sa calidade de sa registrazione est cussa chi est peroe su coro b’est intregu e de cussu e pro cussu li torro grassias de cada manera. Chin salude.

Salamitra