Sa Caresima mea, amantiosu comente soe de su connottu, est Chida Santa e cussa appo a chircare de bos contare. Aendela connotta de cada manera, pro medas annos, in tottu sa Sardigna, naro chi est un’ispantu e peri chi non est folklore (si l’est benende a essere commo, sa neche est de medas, non de pacos ebbia) ca est precadorias de zente sinzèra chi las ischiat precare, manscamente cantare. E bos naro una cosa, sas paragulas chi intendio non fin paragulas de labras ebbia, fin paragulas chi essian dae sas intragnas, paragulas suffertas, e non a palas anzenas. 

In tottus sas cantones e precadorias, de tottube, abisumèu si lastimat su dolu chene laccana de sa mama, prus che sa morte de su fizu. Sun cantones anticas, de mamas de medas tempos chin intran in parte chin su dolu de sa Mere Manna, pessechia in su coro dae sette ispadas crudeles. Deo “cussu” chircavo e accatavo andande dae bidda in bidda e “cussu” m’azzudavat a pessare abberu, in manera funguda. 

Duminica ‘e Parmas ebbia est s’unica chi non cussidero die de “Passione”, belle chi in sa Missa mezzore si leghet su Passiu. Est die de festa e pro biere sa festa, cad’annu, andavo a Desulo ca sa prozessione de ibe, chin sas Priorissas cantande su Rosariu a s’antica e sas parmas pinzicorradas in manos, comente a nessun’attera prozessione assimizat a s’intrada festosa de su Sennore a Gerusalemme. Sa festa, peroe, jà fachet impresse a urtimare ca belleche derettu cuminzan sos dolos, “Sos Misterios”. Mancu nau chi “Misteriu” non cheret narrere jocare a cuba cuba ma s’intrada in sos pessamentos fungudos, cussos de sa fide. Su connottu de dommo nostra sos Misterios los at retrattaos chin “sinzos” e istatuas de linna, de bellesa rara. In sas biddas a furriu pezzi in Orosei los sun bocande in prozessione, e los bocan su martis sero. Sun istatueddas bedusta, galanas, sos “Zi-omo”, su Cristos pessichiu de cada manera: dae sa tenta in s’ortu ‘e s’ulibare, a sa posta in ruche. A palas las juchen sos de sas Cuffrarias de sa bidda. S’istatua de Nostra Sennora andat iffattu. E cuminzan sos canticos lastimosos, pessae a cussu chi bos appo nau e nazemi si non est beridade.  «Sa sennora nostra at prantu, tottu sa notte a succuttu, mannu est su curruttu. Nazemi Sennora mia, sezis cussa lastimada, chi giaman Maria? Pruitte la cubades cussa cara bianca che nie? Nadelu, pro chie?”… “Deo soe s’afflizzida, deo soe cuss’attristada, deo sa tribulada, deo sa pessichida. Non mi giamedas Maria, né de grassias piena, ma de dolos e penas, de turmentos e agonia… Non mi giamedas Maria!». Tottu torrat a cue, a cussa Mama, chi est peri Fiza e Isposa, ma chi, in s’occasione, est mama de dolos ebbia, una mama curruttande sa morte crudele de su fizu innossente, morte de ruche, sa pejus morte chi a sos tempos sa zente timiat… 

Su Jobia, appustis de su “lavabo” e de sa “Missa in Coena Domini”, in sas cresias si ligavan sas campanas pro abbarrare mudas e in sos artares si cuzicavan sas istatuas chin pannos in color’e viola. Commo, ube galu b’est s’usanzia, su Santissimu si trocchet dae s’artare mazzore a un’atteru, tottu froriu e iscuricosu, chi nanchi est “Se sepurcru”belle chi su Cristos est galu bibu. E cumintzan “Sas chircas” de sas sette cresias, e in cada cresia “su Sepurcru”. In Nugoro, belle chi sun colaos medas annos e chi “registraziones”, a sos tempos, nemmos nd’at fattu, sos bezzos contan (galu chin ispantu) de sa bellesa de sas boches de Pride Antoneddu Brillante e de sos Frades Soreddos. Nanchi ponian sa tudda a los intendere cussos canticos a luch’e istiaricas. In sos “Sepurcros” frores beraniles, nuscos chi non benit bene a ismenticare, su Cristos in ruche e, a costazu, “su Nennere”, “su Laboreddu”, su tridicu essinde a campu dae s’iscuricore, sa bida binchidora de sa morte: misteriu de sa fide! 

Sa Chenapura Santa est die nota pro “S’Incravamentu” e pro “S’Iscravamentu”, sos mamentos prus poderos de tottu sa Chida Santa. Prozessiones de ispantu, a manzanu e a sero e ispantat su pore de sa zente chi b’accurret belle chi siat die de laborìu. Precadorias e canticos chi fachen parte de unu connottu chi b’est su tantu de si bantare pro l’aere ammantesu gai comente fit a su tempus de sos mannos. E duncas “s’Incravamentu” de su Sennore lu fachen pesande sa ruche in s’artare, e “s’Iscravamentu”, appustis, falandechelu dae sa ruche matessi. Tottu benit fattu a sicunde de comente narat de fachere su preicadore presente. Appustis de medas annos naro chi, “a biere” su chi b’est capitande, ponet semper e galu sa tudda. Si su preicadore est balente abberu b’at de narrere chi sas paragulas suas, in annatta, resessin a apperrere sas gresuras de sos sentimentos fungudos de sos chi sun in cresia, ascurtande e biende. Appustis, a iscuricore, b’est sa prozessione chin su Cristos mortu in sa lettera e chin Nostra Sennora iffattu, semper chi sa cara “bianca che nie” e chin su coro trapassau dae sas ispadas de su dolore. 

Urtimada sa prozessione est comente chi urtimet sa Chida Santa ca su Sappadu est die de isettu. Pasca at a essere s’incras e at a essere un’attera die. 

E commo, in concrusione bos faco una dimanda: ma, a contos fattos, est galu gai, comente bos appo contau? Est galu gai, sa Chida Santa de su connottu, o est bennia a essere una “cartolina” galana de su “colore locale”? 

Attera dimanda: est “un’ammentu” ca est est bennia a macare sa zente de gabbale chi su connottu lu fit ammantende bibu a forza ‘e tantu? Zente noba in sas cuffrarias a nde sezis biende in biddas bostras? O est benende binchidora sa birgonza ca nanchi non b’est prus su tantu? Nazemilu bois, fachiebbolla sa caridade, chene favula, e fachiemilu ischire.

Salamitra