E peri occannu, brulla ca ti brullo, nos semus postos a inchendere in bucca ‘e janna sarmentu de bide, archimissa, ramasinu e frores de Santu Jubanne, e resessios bi semus a contipizare sa faina, chi est naschia gai, a sa macconazzina, ott’annos a occannu. Narrere chi soe cuntentu e peri chi mi nde banto est pacu, ca non pessavo de connoschere e biere su chi, annu chi annu, appo bidu e connottu. “Tonì, itte naras. A provamus a biere si nos iscappat su risu e bi resessimus?”. Gai est naschia custa chi paret una paristoria. E resessios bi semus. 

Ott’annos a commo nos at dau gherra, e meda puru, ca naro sa beridade chi non ischiavamus nemmancu dae ube cumintzare, dae ube accapidare su chi nos serbiat. Su sarmentu jà bi fit, ma nche cheriat accapidau e remoniu, e jà fit una pudda (mancu male chi fimus prus sanos de oje!). Sos frores de Santu Jubanne toccavat de andare a los chircare chin s’ispera de nd’accattare. S’archimissa e su ramasinu (mancu male) los ajo in dommo. Su raju fit chi tempus bi cheriat, e cussu non est sempere chi benit bene a l’accattare ca cadaunu a su tempus suo. Appustis toccavat de biere a chie lu narrere de bennere a brinchiare su focu e benner’a essere compares e comares. Galu appustis, cale podiat essere su loccu ube nanchi apparizare “s’imbentu”? E sa robba de ammaniare, chene ischire canta zente bi podiat accudire? A urtimu su pessamentu: e si non si podet e si ponen a nos narrere cosa? Solu cussu bi mancat!

Fatt’istat chi, semper brulla ca ti brullo, nos semus postos a fachere e a narrere a sos amicos e cumpanzos de accudire pro s’occasione: su 23 de lampadas a su pesperu fit su connottu, e ube? Cara a cara a dommo mea. Muzere mea, chi in bolos e in bentos est diffizile chi bi pottat andare: “Itte si bi suprit zente meda e su chi semus ammaniande non bastat. Bella figura bi faches!”. (A sa solita, si sa cosa non benit bene, sa neche est sempere sa mea ebbia). E deo? “Si non bastat cheret narrere chi brinchian su focu e s’accuntentan de diventare comares e compares de Santu Jubanne!” e bell’e fatta e finia! E imbetzes, cad’annu, dogau cussu de su Covid (chi su focu l’amus brinchiau in 4 ebbia: deo, muzere mea, Tonino e Peppeddu su catteddu chi amus in domo), est istada sempere un’iscummissa binta chene mancu la jocare. Benin sos pacos chi chircamus. Cadaunu carrat attera zente a piachere suo. Sos chi sun bennios annos innantis torran, e non bi torran a sa sola, ca carran zente issos puru. Ma su bellu non est cussu. Su bellu est chi belle tottu cantos non bi benin a manos iscuttas. Rara sa pessona chi non battit s’ampulla ‘e su binu, sartizedda, durches, pizzas comparadas e fattas in dommo, e cada grassia ‘e Deus (chi s’annaghet a su chi ammaniamus annu chin annu). 

Una cosa peroe b’at de annaghere. Cando tuccavo iffattu de sas biddas, accapidande festas e usantzias nostras, mi davat gherra a ischire ube nanchi bi fit galu s’usantzia de sos focos de Santu Jubanne. A urtimu nche soe dau a Paule e in cue appo assazau, aisettande de brinchiare su focu, fava cotta a landinu. Cussa nanchi fit s’usantzia dae sempere. A sa ghirada mi soe postu a pedire a Dolores Turchi itte nanchi podiat narrere cussa fava, e issa m’at nau chi fit usantzia antica meda pro ammentare sos mortos. Bella custa! Appustis mi soe postu a chircare e a leghere e m’est essia a campu s’usantzia antica de s’abba muda (chi galu si fachet ma non “coment’a tando”). A mesunotte s’andavat a sa cresia de su Santu e si toccavat su portate nande: “Andande semus!”. Andavan a sa tale funtana, e andavan s’unu iffattu a s’atteru, lassande su loccu pro nanchi colare “sos mortos”. Bella custa! Sa festa de Santu Jubanne occasione pro nanchi torrare sos mortos? 

Appustis benzo a ischire chi in Aidumajore, galu oje, pro s’occasione ustrinan, sos chi addobian a su focu, chin pipieddas de cocone: mascrittu, feminedda e Lazzareddu. Lazzareddu? Su Lazzareddu est fattu a manera de creatura fascada (comente fascavan sas creaturas a tempos meos) dae pedes a conca, peri in conca. A mimme m’est benniu a pessare comente a sempere: ma est una creatura o unu Lazzareddu abberu, unu de cuddos chi deppen torrare a bibos dae mortu? O Raju! E duncas, pro ischire o non ischire, compare Giancarlo, dae sa borta, ammaniat una bella padedda de fava, chi a contos fattos piachet a dischissiu (occannu non bi soe mancu resessiu a nd’assazare). 

E deo? Innantis de inchendere su focu mi ponzo a narrere, proitte sa fava, proitte su Lazzareddu, proitte s’usantzia, ca pesso chi siat zustu de ammentare cussu chi no-nche semus ismenticande. E issos, sos chi addobian? A malaboza lis toccat de ascurtare si cheren brinchiare su focu, diventare comares e compares, e assazare (namuli assazare!) su chi b’est ammaniau supra de sas mesicheddas (chi pesso chi sian diventande pacas abberu). Ismenticavo! Itte cheriat narrere sa festa? Itte si navat a s’occasione? Ecc. ecc. Cadaunu ischit e contat sa sua. E lassamus chi cadaunu la contet, peroe, fachimus a manera chi custa frichinia de ammentu resessat a brinchiare sas gresuras de su tempus e chi sos pitzinnos de oje si facan a mannos brinchiande su focu e diventande compares e comares, a su connottu.   

Salamitra