E duncas peri occannu, male coment’amus pottiu, amus festau su Redentore. Cumintzo fachendebos custa dimanda pro sichire chin atteras. Lu semus festande nois o lu sun festande sos istranzos, a piachere issoro? Ma su Redentore b’est semper’istau in mesu a cussas roccas? Diat parrere chi eja ca de cuss’istatua non ischimus prus nudda. A s’ammentu chi diat cherrere ammentau l’amus ghettau s’abba ‘e s’ismenticu! Bellos meos, cuss’istatua non est “una cosa deppia”, chi non isco dae chie. Non est in cue pro bella mustra e nemmancu pro remonire zente dae tottube. E annago peri chi sa festa chi fachimus non est sa festa chi diat cherrere fatta, ca custa non podet essere sa festa pro “cussu Redentore”! E duncas bos deppo ammentare unu contu. Cumintzo nandebos chi su Redentore non est istau semper’in cue. Est arribbau a Nugoro a s’arbeschida de su 1900 ca b’at appiu nugheros de gabbale chi l’an cherfiu, pediu e chi a gherra nche l’an battiu. Su 1900 fit s’annu de su Zubileo mannu e su Papa Leone XIII ajat pediu chi in cada regione b’eren postu un’ammentu pro s’occasione santa. Su Piscamu de tando fit Sarbador’Anzelu Maria De Martis. Issu ajat crumpesu chi cussa fit un’occasione pro adderrettare su garrigu in sa bidda nostra de tando. S’ammentu chi toccavat a sos sardos deppiat arribbare a Nugoro, e deppiat essere unu Redentore, ca in Nugoro de cussu b’ajat bisonzu. In sos giornales de tando su Monte lu presentavan de custa manera: «La sua natura aspra e selvaggia si presta per agguati, rapine e nequizie di ogni genere». Galu pejus iscriviat Jubann’Antoni Mura: «Sulla scoscesa inaccessibile vetta del selvoso Ortobene, ove la vendetta e l’odio fraterno maturò aspra ed atroce, ove da ogni zolla e da ogni stretta, lugubre, di un ucciso esce la voce». E beniminde!

E duncas su Piscamu, chin pacos nugoresos de gabbale, fachet unu Comitau e si ponet a pedire a su Papa chi si facat sa caridade de lu dare a Nugoro cussu sinzale beneittu. Deppiat essere unu Redentore, ca de cussu b’ajat bisonzu. E cumintzat sa gherra ca, in Nugoro, fin in medas (peri sos de sa Cumona) chi unu Redentore non bi lu cherian. Fatt’istat chi sos de su Comitau, a forza ‘e gherra, sa gherra l’an binta. E proitte l’an binta? Pro nos dare una ghettad’e manos ammaniande sa festa chi semus fachende? Non pesso! Su Piscamu peroe jà l’ischiat. «L’onore insigne toccato a questo lembo oscuro di terra sarda, per cui volsero tempi tanto luttuosi, che gli imposero durature macchie di ignominia, ci deve stare a cuore. Dobbiamo lavare l’onta che pesa sul nuorese, per i tristi drammi di sangue, che in questi ultimi anni si svolsero. Concorriamo tutti a quest’ora redentrice». Bos ammento chi s’annu innantis ajan fattu sa “Cassa Grussa” de Morgogliai. E duncas, itte deppiat essere “cuss’ammentu”? Unu Redentore? E chie lu deppiat fachere? Bella custa! Unu de su Comitau, Zizzittu Mura, connoschiat un’artista calabresu gia garrigu de fama e de valore. Missente Jerace, un’istranzu mai bidu e mai connottu! Fit calabresu de naschidorju, de s’Aspromonte, e si cuss’istradone de Montelongu at cussu numene de badas non est. E torramus a su contu. A Missente l’an pediu su ‘e pedire, nandeli peroe chi fin ispiantaos. Chi sa zente fit cascande gana e chi su ‘e fachere cheriat fattu, ca sa bidda nd’ajat bisonzu ca non fit unu nid’e corbos ebbia. Commo bos dimando, e cussiderae sa dimanda. Calesisiat su travallu chi fachies, dae su cale campaes sa famillia, si zente mai bida e mai conotta bos pedit de contipipizare faina, de importu mannu, pro sa cale bi cheret gherra e tempus meda, e chi azzettande non bidies mancu unu soddu, bois itte fachies?  Nazes chi eja o chi nono? E muzere bostra? Ischinde peri issa de sa gherra chi bi cheret pro fachere su chi sun pedinde, e chi in su mentras non podies fachere atteru, sende bona massaja, connoschende sos bisonzos, itte bos narat? De azzettare o de apperrere sos ocros? Pessaebi bene. Pessae a cussu chi podet aere colau cussu cristianu innantis de dare una risposta a zente mai bida e mai connotta. 

E sa muzere itt’at fattu? S’est posta de rucrau? Nosse, l’at nau goi: “Coro mè, fache su ‘e fachere, ca non ti lu sun pedinde cussos poverittos, ma ti l’est pedinde su Sennore!” Cussu l’at nau, ca Missente l’at iscrittu in sos pariros suos, chi deo appo lettu. Missente at crettiu abberu chi seret istau su Sennore a li pedire de apparizare cussu “sinzale” de su Zubileo: unu Redentore! E Missente at nau chi eja. In su mentras sa muzere s’ismaladiat e nche l’at mortu peri una creatura. Su dinare dae Nugoro arribbavat a bubbuliccos, e non fit a issu, ma pro sa funderia. Fatt’istat chi s’istatua cheriat urtimada pro su 1900. Pro neche de su dinare, chi istentavat a arribbare, su 1900 nch’est colau chene urtimare s’istatua. Cando si narat sa sorte! Sa muzere si nche morit a faina belle concruia e fit morta de maladia e non de assustru comente navan in Nugoro. Peri deo ischio de cust’assustru! Si su dinare arribbavat puntuale Missente fit istau resessiu a urtimare s’istatua e Luisa l’ajat appia bida, posta in su Monte. E imbetzes nosse! Si biet chi deppiat andare gai. Fatt’istat chi s’istatua arribbat a Nugoro un annu appustis, e Missente non bi benit ca est galu curruttande sa morta de repente. At a bennere s’annu imbeniente e sos nugoresos l’accasazan de cada manera. A biere su Redentore andat a pede, e lu biet in sas roccas, ube l’est passiu chi siat naschiu. «Solo allora ho constatato che tutte le mie ansie, tutti i miei sforzi, le rinunce, le fatiche e i sacrifici sostenuti per la realizzazione di quell’idea, non furono vani… Avevo raggiunto lo scopo per il quale li avevo affrontati. Avevo capito che, attraverso il mio povero e umile simulacro, uno spiraglio di luce nuova veniva ad illuminare, nel tempo e nello spazio, la fervente anima sarda». Custu at nau Missente Jerace biende s’ispantu. Est appustis chi si ponet sa cara de pedire “sas ustrinas”. Dinare nosse! At pediu una rosa ebbia! A sos nugoresos, de tando e de sempere, pro more de tottu cussu chi at fattu e chi at deppiu patire, at pediu chi, cando anzian a su Monte, in cussa lapide bi ponzan s’ustrina de “una rosa”. Deo non ischio nudda de custu disizu, ma commo chi l’isco, non perdo s’occasione pro lu fachere ischire, e mi nde banto. S’ustrina de una rosa! A bi pessaes? A li toccat una rosa a Luisa e Missente pro su chi an fattu pro sa bidda nostra? Pesso chi eja. Itte bellu chi diat essere si, pro s’occasione, sos nugoresos e sos istranzos si dian ammentare de cuss’ustrina! Torramus a sa festa. Est ora, eja o nono, chi sa festa de su Redentore torret a essere “sa festa de su Redentore” e non de su Folklore? Non bos parjat dimanda de pacu prus o mancu. Deo pesso chi siat zustu chi siat. Bidie bois e cadaunu facat sa parte sua. 

Salamitra